荷蘭租屋事件薄
（二）「大家都係中國人」趁火打劫嘅業主
上次提到，喺荷蘭試過一年搬四五次屋。事源剛碩士畢業嘅時候，喺阿姆斯特丹好難搵到好嘅屋。一來筆者比較挑剔，二來有啲屋實在轉唔落;結果每一次搵到嘅都只能夠係兩三個月嘅短租。隔一排就要搬一次屋，一直持續左一年，先至搵到長住嘅地方。
「大家都係中國人」呢一句說話喺外地真係聽唔少。剛剛畢業嗰一年，偶然遇上一位華裔嘅業主，喺當地已經居住多年，結婚生仔仲有幾個物業。佢其中一個物業係位於阿姆斯特丹東南面嘅「新市鎮」。
要知道，呢一個「新市鎮」廿幾年前係十分污煙漳氣嘅地方。治安非常之差。公司入邊有啲前輩好後生嘅時候就住過果附近，形容治安差到，叫外賣嘅時候只能夠「開少少門攞嘢食」，附近嘅公司夜晚會安排保安送女同事去搭車。
係呀，你冇睇錯。出咗名安全嘅阿姆斯特丹，原來廿幾年前都有不堪回首嘅一面。
今時今日嘅「新市鎮」當然比廿幾年前安全得多。但畢竟比市中心「雜」一啲，都唔一定係100%安全。但當其時實在係好難搵屋，即使係「新市鎮」都無奈要睇一睇。
呢一間屋入邊有四間睡房，當中有三間房係比三位三位唔同國籍嘅女學生住緊；第四間房係最大嘅，當中嘅住客係南韓人，準備離開荷蘭。
呢一間房嘅開價，居然同市中心嘅房間價錢一樣，甚至乎貴一啲。你一位「大家都係中國人」嘅業主就表示，因為最近裝修完，而且包埋傢俬水電，所以貴一啲。但由於位置比較偏遠，我實在比唔落手。之後就話要考慮一下，就離開咗間屋。
點知，離開嘅時候去搭地鐵，居然遇上本身嘅住客。因為南韓女仔就走來同我講：「我哋幾個女仔本身想同你講㗎 ！我而家俾緊嘅租金呢，係佢向你收嘅租金嘅一半啊！當其時佢喺度我就唔敢出聲囉！不過我哋嗰幾個覺得佢真係好過份呀！」
真心，我都預咗會俾個業主漫天要價。不過當原本嘅住客同你講，個業主當你水魚諗住收多你一倍租金，其實都幾無奈。
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲 #香港人加油 #搵工 #搵屋 #租屋 #租樓 #租房
Search